Pablo Ruiz Picasso (Malaga, 25 oktober 1881 – Mougins (Vrankryk), 8 april 1973) wos ne Spoanschn kunstschilder en beeldouwer. J'es anziene lik een van de grotste artiestn van de twintigste eeuwe.

Werk

Zyn vulle noame es eigentlik Pablo Diego José Francisco de Paula Juan Nepomuceno María de los Remedios Cipriano de la Santísima Trinidad Clito Ruiz y Picasso. J'es surtout gekend lik uutvinder van et kubisme. Dat wos e heel nieuwe kunststromienge woaby den kunstenoare zyn werk updeelt in klene stikkn en ze toun were t'ope briengt tot één abstract geheel. Die stromienge es nie in ene keer ountstoane moa wos 't resultoat van en evolutie van zyn werkn die z'in verschillende periodes indeeln:

• Barcelona-periode
• Blauwe periode: Desemparats uut 1903, The Madman uut 1904
• Roze periode: Portret van Señora Canals, Circusartiest en joungne
• Kubistische periode: Les demoiselles d'Avignon uut 1907, Blanquita Suárez uut 1917
• Neo-klassieke periode: de absynth drienker en Zefportret
• Surrealistische periode: D'n dans
• Abstracte of expressionistische periode: Abstract oofd, Abstract portret

Picasso eit oungeveer 13.500 schilderyen, 100.000 etsen en gravures, 34.000 boekillustroaties en 300 beeldouw- en keroamische werkn gemakt.

In Malaga, zyn gebortestee, ei je et Museo Picasso Málaga et et Museo-Casa Natal Picasso, zyn geborteuus woa dan ze keramiek en etsn van em toonn.

Leevn

Picasso kost'ol tekenn en schildern van jounks of an. 't Eeste dat 'n koste zeggn, wos lapiz, dat es Spoans vo potlood.

't Louvre van Parys eit zyn werkn tentoongesteld oe Picasso 90 joar oud wos. Dat wos e hele ere want 't wos 'n eestn kee da't Louvre dat dee vo nen artist die nog by leevn wos.

Picasso eit vier kinders ged en j'es drie keers getrouwd gewist.

Externe koppeliengn

• Museo Picasso Málaga
• Fundación Picasso, Museo Casa Natal
• Museo Picasso, Barcelona
• Musée Picasso, Parys
• Picasso in et Metropolitan Museum of Arts, New York
• On-line Picasso project