Unicode is en Standard, de alle Teken ut alle bekannten Schriften un Tekensystemen en Kood towiest. Mit dissen Standard schall dat lichter warrn, sik internatschonal uttotuuschen un dorbi to’n Bispeel in Text Teken ut mehr as een Schrift to bruken. De öllere ASCII-Standard hett to’n Bispeel blot en Ümfang vun 128 Teken un ISO 8859-1 vun 256 Teken. Dat reckt för dat normale latiensche Alphabet un en Reeg Sünnerteken. De Chineesche Schrift alleen hett aver Dusende vun Teken. Unicode hett en mööglichen Ümfang vun 1.114.112 Teken. De eerste Version is in’n Oktober 1991 rutkamen un harr 28.302 Teken. De aktuellste Version vun Juli 2006 hett 101.203 Teken.